《接收遺棄 - 吉吉》
- Hedgehog Hk
- 2022年9月6日
- 讀畢需時 2 分鐘
接收左一個一歲半嘅女仔，叫做吉吉
一日之前有搵過檢查，亦都因為打乞嗤嘅問題睇過幾次醫生，最後因為估計佢屋企人食煙令佢唔舒服，所以決定將佢交俾我哋
小朋友基本上會喺我哋度觀察一個月，一切正常嘅話就可以去新屋企啦，有興趣了解領養詳情嘅朋友可以去我哋網頁睇一睇：
🦔🦔🦔🦔🦔🦔🦔🦔🦔🦔🦔🦔🦔
以下係姑娘廢up嘅時間，冇興趣嘅朋友可以直接省略
帶返個頭盔先，
協會本身對遺棄冇任何意見，因為知道每個人承受嘅能力都唔同，所以有follow開我哋嘅朋友都知道其實我哋不嬲唔問原因，除非主人自己講，因為選擇得遺棄一定有佢自己嘅原因，而且已經決定好咗，冇必要再追究落去，我哋成立嘅原因亦都係因為唔想佢哋抌出街，避免指責而令佢哋卻步
認識姑娘嘅朋友，都知我本身係一個比較爽直又倔強嘅人，有啲問題其實我只係唔明白，例如最近遇上嘅兩單遺棄：
最近除咗呢個遺棄之外，
仲有另外一個朋友話親戚屋企人中風，
因為要搬去居屋照顧而需要遺棄一隻大型狗狗
對我來講，呢啲都係一啲我唔明白嘅事情。
我唔係唔明白佢哋遺棄嘅原因，
我唔明白嘅係處理嘅手法。
對我來講，呢啲都係直接不過嘅事情——
最基本嘅係，如果我承諾左就必定會盡我能力去達成承諾，寵物對我來講真係屋企人，
佢哋陪伴我嘅時間，我哋之間嘅愛，
都係冇辦法割捨嘅一部份
如果屋企人患病，我有冇機會可以接過嚟我屋企照顧呢？地方淺窄唔緊要，
我知屋企人唔會介意
如果真係得劏房咁大（雖然我成日都唔明白嗰個大小嘅屋企點樣可以正常咁比到生活質素一隻動物，又或者係承擔正常醫療費用，但係有陣時窮得只有愛，我對呢類型冇評論）、
又或者屋企人好介意等等我唔明白嘅因素，
我會選擇將佢哋暫時放喺寵物酒店，
又或者朋友屋企，之後我會租另外一個可以處理呢啲事情嘅地方。
總之我就會用盡我嘅努力去搵方法拆掂佢。
姑娘，係錢啊，你講到唔駛錢咁
一份工唔得就搵多一份工
最多瞓少啲食少啲再辛苦啲
我甚至乎因為擔心需要嘅時候搵唔到工作或者想到時得到好少少嘅Offer，係大多數人打機睇戲煲劇嘅時候，我基本上不斷進修冇停過，瘋狂睇同興趣有關、唔同領域嘅教學同埋research
公屋出身，我必須比其他人更加努力先可以令自己同埋屋企人得到保障
但為咗重要嘅人同埋事情，呢啲辛苦都絕對值得
呢啲就係我嘅倔強、堅持。
我明白每個人可以堅持嘅程度唔同，但係呢個亦都係我對呢啲事情最唔明白嘅地方。
除咗絕症、死亡
所有問題都有解決嘅辦法，
差在你為咗呢件事肯幾努力。
咬緊牙關，學我屋企人話齋
冇難關會持續到永遠，總有一日會過去
共勉之
Zofeya
留言